湊bb真係好辛苦, 點解人地餵人奶個bb可以2-3個鐘先食一餐, 我個bb就好唔定時, 有時半個鐘, 有時一個鐘, 2-3個鐘都試過, 但就一定係bb瞓得冧先係囉! 好辛苦...好累...呢個月真係好辛苦, 有血有汗.

奶媽條路好難行, 我一開始已選擇左個奶媽餵人奶, 我好希望可以全人奶最少一年, 初生第一個月係奶媽最辛苦既時期, bb一喊就要餵, 不分晝夜, 但係而家bb都差唔多滿月啦, 飲奶pattern應該會穩定少少, 點解bb仲係咁唔定時呀..?

每次餵奶時間都好長, 有時半個鐘, 有時超過成個鐘添! 因為bb成日飲飲下奶瞓著左, 又要叫醒bb飲. 叫唔醒就放落床瞓, 點知隔一陣又喊, 又要餵過, 如是者, 每日不斷重覆做呢個動作好多次. bb雖然有時喺到啜啜啜, 但我發覺bb好似當左係奶咀, 唔係飲緊奶. 我唔俾佢啜, 佢就郁身郁世, 又開始扭計要喊, 我都冇晒乎, 唯有俾bb再啜過. 有時連續幾個鐘都係咁, 一直抱住佢俾啜, 又唔肯瞓, 真係人都顛!

做奶媽比奶粉媽多d憂慮, 因為埋身餵的話, 根本唔知bb飲左幾多奶, 每次bb喊, 就諗究竟係咪bb食唔飽呢? 係咪我唔夠奶俾bb呢? 咁點算呢, 心底裏有一絲念頭諗要唔要補奶粉... 有時真係好炆, 忍唔住鬧bb, 希望bb可以乖d, 又試過打bb屁股, meet bb塊面以作發洩. 好似好殘忍咁, 對一個初生bb已經要體罰, 但我真係忍唔住啦! bb, 媽媽真係好累好累啦, 你乖d啦! 你究竟係唔飽, 定係扭計要抱要食奶咀? 可唔可以話俾我知?!

有時真係令到我好沮喪, 明明餵左好長時間, 點解一放bb落床佢又即刻喊, 好似仲想食咁, 係咪我真係唔夠奶呢? 我已經飲木瓜魚湯, 成日俾bb埋身啜, 刺激做奶, 仲可以點?

上星期帶bb去健康院檢查, bb有4.2kg, 比出世重左0.725kg, 姑娘話重得好好, 因為初生bb一個月重0.5kg已合格, 我bb未夠一個月己超過0.5kg, 因我係全人奶, 所以姑娘話我夠奶冇問題, 而且check左bb黃疸少左, 本來18x, 當日跌到13x, 即係bb夠奶先夠水份, 黃疸先會退. 當堂幾開心呀, 即刻對做奶媽有番信心!

以為有少少成績, bb飲奶會定d, 但每日bb總會不停扭要奶, 呢個時候我的信力開始有d動搖, 同埋有d沮喪, 又諗番同一個問題, 究竟我夠唔夠奶呢? 唉, 做奶媽要有無比意志力、毅力同體力, 少d意志力就俾左奶粉, 少d毅力同體力都會放棄, 夜晚要醒兩三次餵奶, 晏晝bb成日唔肯瞓, 坐月期間精神同體力消耗好大, 人地話bb滿月後會好d, 就快滿月啦, 我真係好期待, 好希望會易湊好多.

做奶媽真係好需要支持, 唔係好難捱. 好彩, 太霖好支持我餵人奶, 但我自問有時信心真係唔夠, 都唔知餵bb飽唔飽. 我好希望我捱得過呢段艱苦時間, 快d雨過天青, 快d得心應手...